Dyma Atgofion y Grand: Y Gorffennol, y Presennol a’r Dyfodol. Prosiect yw hwn a grëwyd gan Race Council Cymru ar gyfer HWB Amlddiwylliannol y GRAND ac a ariannwyd gan Gronfa Treftadaeth y Loteri Genedlaethol.
Mae’r prosiect hwn yn cofnodi atgofion pobl am yr hyn mae adeilad y Grand yn ei olygu iddyn nhw, ac yn taflu goleuni ar eu straeon gan ddefnyddio ffotograffau a chyfweliadau, ystyried sut mae’r adeilad wedi esblygu dros y blynyddoedd i’r hyn mae’n ei gynrychioli erbyn hyn; sut mae wedi cipio calonnau’r holl bobl, a beth fydd gan y dyfodol i’w gynnig. Mae’r prosiect hwn hefyd yn trafod pwysigrwydd lle mor eiconig a sut mae’n datblygu mewn dinas sy’n newid yn barhaus, ac yn dal i fod yn adeilad sy’n annog pawb i ymweld a chael profiad newydd.
Sefydlwyd Theatr y Grand Abertawe yn 1897, ac mae’r adeilad yn gyfoeth o hanes diwylliannol, mae’n ganolbwynt annatod i ddinas Abertawe. Mae wedi sefyll yn gadarn ac yn falch am fwy na 120 o flynyddoedd ac wedi agor ei ddrysau i gynulleidfaoedd gael gwylio perfformiadau sydd wedi amrywio o gomedi Ryan and Ronnie, i’r seren leol Catherine Zeta Jones.
Mae Race Council Cymru wrthi ar hyn o bryd yn sefydlu ei hwb amlddiwylliannol cyntaf yng Nghymru, a fydd wedi’i leoli yn Adain y Celfyddydau yn Theatr y Grand Abertawe. Mae Hwb y Grand yn cynnwys 23 o wahanol grwpiau llawr gwlad o leiafrifoedd ethnig a fydd yn gweithio yn adeilad y Grand. Rhoddodd y cymunedau enw newydd swyddogol i’r ganolfan ddiwylliannol newydd yn Abertawe: Hwb Amlddiwylliannol y Grand. Nod yr hwb yw datblygu Rhaglen Gyfoes newydd ac arloesol o berfformio proffesiynol, dathlu diwylliannol ac ymarfer cymunedol.
Mae Adain y Celfyddydau wedi cael ei ailwampio i gefnogi’r gweithgareddau newydd lu a fydd yn digwydd yma ac i gefnogi cymunedau i weithio gyda’i gilydd i rannu gwybodaeth ac adnoddau, digwyddiadau creadigol a diwylliannol, oll dan yr unto.
Mae’r prosiect hwn yn gyfle i fwrw golwg ar yr hyn mae’r adeilad yn ei olygu i bobl yn unigol ac iddyn nhw rannu eu profiadau o ymweld, gweithio, a pherfformio yn y Grand o wahanol safbwyntiau. Cawn hefyd ddirnadaeth o esblygiad yr adeilad ar hyd y blynyddoedd a’r hyn sydd ganddo i’w gynnig nawr ac mewn blynyddoedd i ddod.
